• +998 (91) 435-72-09
  • inja_sanat@mail.ru
  • Furqat st. Tashkent, Uzbekistan.
Nazm minbari
«Кўҳна Кофарниҳон соҳилларида, Жим ором олади дарё армони…» – Орифжон КОМИЛ

«Кўҳна Кофарниҳон соҳилларида, Жим ором олади дарё армони…» – Орифжон КОМИЛ

КОФАРНИҲОН АРМОНИ
Асқар Маҳкамга

1.
Бувижон,
сарғайган ҳорғин кўзларинг,
дунё осмонига боқаркан маъюс.
Сўлиғинг қоришган ғамгин сўзларинг,
лойдевор пойидан ўтмади ҳануз.
Ҳануз нигоҳингда соғинч дамлари,
таҳ-батаҳ қатламин этади ҳосил.
Кўксингни куйдирган очун ғамлари,
ҳануз пешонангда машаққат нозил.
Тонгги ибодатлар ҳаловатидан,
дуога очилган титроқ қўлларинг,
тилингдаги оят тиловатидан,
самога интилар иймон йўлларинг.
Баҳоринг ёмғирли, хазонли кузинг,
саратонда жаззоқ куйдирар жисминг.
Яралгандан буён ўйламай ўзинг,
сабрга айланди муборак исминг.
Бувижон,
дунё – бу бир тутам хасдек,
қовжираб борарми вақт офатидан.
Уч кунда телбавор юрамиз мастдек,
фароғат излаймиз йиллар қаъридан.
Кенг ҳовлинг жуссангга тор келса баъзан,
дарахтлар елкангга суянч бўлмаса,
ва ё Кофарниҳон соҳилларидан,
топган ҳузурингдан кўнглинг тўлмаса.
Харсанглар сукутдан кўтариб бошин,
тингларми кўксингдан учган нолангни.
Кофарниҳон каби шарқираб ёшинг,
қаттиқ соғиндингми Асқар болангни…

2.
Кофарниҳон – далли ҳамроҳим,
дарвешдай ёҳулаб мавжларинг келар.
Сенинг-ла оқмоқда дилдаги оҳим,
сенинг-ла умримнинг йиллари елар.
Шеър каби шарқироқ тўлқинларингда,
томчилар самога сачраб рақс этар.
Руҳимни ўстирган соҳилларингда,
нуроний бувимнинг нури акс этар.
Қадимий ўзанинг сарҳадларидан,
қонимга қоришган сувларинг оқар.
Минг милга чўзилган фарсаҳларидан,
умримнинг миллари мозийга боқар.
Сукутда ётибман, хаёлларимда,
бағрида эркалар онажон – ерим.
Шеърлардан иборат умр йўлимда,
Кофарниҳон сенсан – энг сўнгги шеърим.

3.
Армон ҳисларини туйди улуғ йўл,
армонга айланиб оқди дарёлар.
Гулзорда гуллади армон деган гул,
армонда титради гўзал маъволар.
Самолар бошимга айланди чархдек,
дунёлар йиғлади, йиғлади ғамгин.
Тоғларнинг ёнида турибману лек,
армонлар ростламас эгик қоматин.
Ваҳдат куйларининг манзилларида,
оқмоқда ҳаётнинг югурик они.
Кўҳна Кофарниҳон соҳилларида,
Жим ором олади дарё армони…

ОНАМГА МАКТУБ
Онагинам,
заминдай хокисор,
осмондай баланд,
кафтлари гул каби хушбўй райҳоним.
Йўқлаб келмадими, бемеҳр боланг,
болам деганингда оғринар жонинг.
Олтмиш йил олтиндан азиз умрингда,
бирров ўйладингми ўзингни бир бор.
Боланг ухлатмаган бедор тунингда,
заҳматинг юкини этмадинг нисор.
Шодлигинг улашдинг, олти томондан,
олти жон жисмингни қувватин сўрди.
Тиним не билмадинг тонгги азондан,
хуфтонлар қўлингни меҳнатда кўрди.
Қишни – қиш демадинг, ёзни – саратон,
куз ҳам сахийликни ўрганди сендан.
Умрингда баҳорлар бўлганми!? Қачон?!
Қачон хотирингда ҳаловат тўлган.
Емайин едирдинг, ичмай ичирдинг,
киймай кийдирганинг рост эди Она.
Мингта гуноҳимни минг бор кечирдинг,
ярамни боғлардинг қўлларинг қонаб.
Сафарга отлансам қанотлар қоқиб,
дилпора кузатдинг, интизор кутдинг.
Учта қиз узатдинг, юрагинг ёқиб,
уч ўғлинг ортидан ўзни унутдинг…
Ҳаёт бахш этгандинг, тўққиз ой дужон,
икки қат қоматинг қаддини букиб.
Энди мен нимаман, кимман Художон?!
Волидам кўзидан соғинчин тўкиб.
Арзирми онамнинг битта оҳига,
юракдан тўкилган милёнта шеърим.
Жимгина қарайман, умрим роҳига,
кўринар олисдан улғайган ерим.
Кўринар онамнинг мунис чеҳраси,
кўринар йўлимга интизор кўзлар.
Кўринар тонгларнинг сокин нафаси,
кўринар дуога йўғрилган сўзлар.
Асли улуғ шоир – ўзингсан Она,
ҳар лаҳза сабрингдан бир ашъор дўнар.
Болангни соғиниб гирёнсан яна,
ва яна вужудинг соғинчга кўнар.
Гуноҳга қоришган умр йўлимда,
тавбаларим ғамин еган фариштам.
Имконлар узатиб юз бор қўлимга,
имконсиз қолганинг айтмадинг ҳечам.
Дунёдан дунёлар излайман бугун,
излайман, йўқотиб, топганим недир?
Пойингдан йироқлаб кетганим учун,
Онажон бемеҳр болангни кечир…

ЁМҒИР ҚЎШИҒИ
Самодан саловот ёғар авжланиб,
тарновлар бокира қўшиғин айтар.
Кўлмаклар олисдан ёрқин мавжланиб,
чумоли шошганча инига қайтар.

Эшитилмай кетар шамол унлари,
Мудраган заминни уйғотар чақмоқ.
Майнинг келинчакдай йиғлоқ кунлари,
ёмғирлар зарбидан сезмоқда чарчоқ.

Гумбурлар тоғларни ларзага солган,
момоқалдироқнинг ўктам зарблари.
Лаббайка айтмоқда эҳромда қолган,
Оқарган тутларнинг яшил баргалари.

Пана жой излайди ҳуркак қушларим,
Мусича жуфтини тополмай ҳалак.
Уйғонган борлиқнинг рангин тушлари,
Ўнгидан келганча йиғлайди фалак.

На замин чанқоғи босилар бирров,
На ёмғир охирги қўшиғин айтар.
На йўллар кўлмакдан очилар дарров,
На дайди чумоли инига қайтар…

БЕШИНЧИ ТОМОН
Онажон!
Тўрт томон сукунат,
тўрт томон жимлик,
тўрт ёнда тўрт мингта ҳаёт қолдиғи.
Тўрт ёндан бостириб келгандай кимдир,
тўрт мингта хавотир туйдим охири.

Тўрт тилда сўйлади уйғоқ ботиним,
тўрт юз йил ухладим зулматлар аро.
Тўрт томонга чопдим,
чопдим бетиним,
тўрт фасл қўйнида, ҳам ғамгинсаро…

Онажон!
Гуноҳлар исканжасида,
тўрт томоним қибла бўлди, билмадим.
Муқарраб малаклар гувоҳлигида,
ғанимат дамларни кўзга илмадим.

Онажон!
Кетяпман қай манзил сари,
қай макон вужудим бағрига имлар?
Тўрт лаҳза тавбамга таянмай ҳали,
ғафлат уйқулари томирим чирмар…

Онажон!
Тўрт томон сукунат,
тўрт томон ғашлик,
бешинчи томонни излайди руҳим.
Бешинчи томонда йўқмикан ҳадик?..
Бешинчи томондан келар андуҳим…

РОСТЛИК
Сиз мендан кечасиз ростини айтсам,
Ростини айтмасам виждоним кечар.
Асли кимлигимни билмайман, қасам
ичмасам қасамлар қонимни ичар.

Апрелда йиғлаган булутлар каби,
Кўзингиз уммонга дўнар сўйласам.
Демакки авлиё бўлмабман ҳали,
Не қилай, ўзимни кўпроқ ўйласам.

Кўксимни тўлдирган эски эҳтирос,
Ёниқ кўзларимда ўйнаган ҳавас.
Ўзимни ошиққа қиламан қиёс,
Ишқим томоғимдан ўтмас бир нафас.

Сизга деб ёзмаган бадиҳаларда,
Риёга эврилиб ўйнайди ҳислар.
Ростдир қўлимдаги саҳифаларда,
Таърифин сўрайди бегона қизлар.

Сиз мендан кечасиз ростини айтсам,
Ростини айтмасам виждоним кечар.
Қачондир мунғайиб ортимга қайтсам,
Кўзларим кўзингиз гулобин ичар…

Fikr bildirish

Email manzilingiz chop etilmaydi.